எதிர்ப்பதம்

எனக்குப் பிடிக்கவில்லை
வியர்வை வாடையோடு
மாற்றாத உடைகளினுள்
குளிக்காத உடல்கள்

ரயிலின் ஒவ்வொரு அதிர்விலும்
நெருக்கமாகும் எனக்கும் சேர்த்து
கழுத்து வரை அவள் போர்த்துவது கூட
துவைக்காத போர்வை தான்

அந்தக் குளிரான இரவில்
காதலின் உரிமையோடு
உச்சந்தலை திருப்பி - அவள்
காட்டிய திசையிலிருந்தது
எங்களைப் போலவே
அந்த அழுக்கு நிலா

தேவதையல்ல

நீ தூசி விழுந்ததில்
கண் கலங்கிய போது தெளிந்தேன்...
"மனுஷி தான்"

மணற்பரப்பில் கிறுக்குவதிலிருந்து உன் விரல்களும்
மாலை வெயிலை ரசிப்பதிலிருந்து என் கண்களும்
சலிப்படையத் தொடங்கிய வேளையில்
நீ வெட்கப்பட ஆரம்பித்தாய்
நான் பயப்பட ஆரம்பித்தேன்